البوست طويل فيه كل ما يخص المواليد الجدد في الكويت، طبعاً دي معلومات جمعتها من تعليقات كتير جزا الله أصحابها خير.
البوست قسمته لـ 10 أقسام عشان التيسير، فمش لازم تقراه بالكامل، هتقرا فقط الجزء اللي محتاجه.
الأقسام هى:
1- تسجيل المولود واستخراج شهادة الميلاد الكويتية.
2- استخراج شهادة الميلاد المصرية (خاص بالمصريين فقط).
3- إصدار الجواز وعمل الإقامة المؤقتة.
4- عمل الإقامة.
5- إصدار المدنية.
6- عمل وثيقة السفر.
7- مصاريف الولادة.
8- الطهارة (الختان).
9- روابط ذات صلة.
10- تنبهات.
* أي حد هنعمله منشن ياريت يقرا الجزء اللي هو محتاجه مع الجزء التاسع والملاحظات اللي في 10.
.
.
1- هتاخد بيان الولادة من المستشفى في أسرع وقت، لو تقدر في نفس اليوم، بس ممكن تاخد لحد 5 أيام، ورقة لونها أحمر كدة.
مرات بيشترطوا خروج الزوجة من المستشفى عشان يدوك البيان. (كل ما يخص المواليد الجدد في الكويت)
2- هتروح مركز تسجيل المواليد تطلع شهادة الميلاد الكويتية، وطبعاً حسب سكنك، ميدان حولي أو صبحان وتاخد معاك:
– بيان الولادة.
– صورة مدنيتك أنت وزوجتك.
– وصورة جواز السفر أنت وزوجتك
– صورة قسيمة الجواز موثقة مع الأصل.
وهتستلمها من مستشفى الولادة، واسأل ساعات ممكن تقدم عليها أصلاً في مستشفى الولادة.
الاستلام من نفس المكان، في ناس قالت هتاخد 4 أيام تقريباً، وناس قالت ممكن تطول لأسبوعين بسبب الظروف الحالية.
بس دلوقتي في بعض المستشفيات بقوا يسلمو هم شهادة الميلاد من بعد أسبوع تقريباً من الولادة فمش لازم تروح مركز تسجيل المواليد، ولو روحت هيرجعوك ع المستشفى.
3- وأنت بتستلم الشهادة اعمل مستخرج رسمي منها لأنك ممكن تحتاجه بعد ما تبعت الأصل لمصر.
بنفس الورق وطابع دينارين وبتستلمه في نفس الوقت.
4- تاخد شهادة الميلاد وتطلع ع الخارجية، توثقها بـ 5 دينار، وتحجز موعد قنصلية وتوثقها بـ 17 دينار.
خلي معاك صور من الشهادة الكويتية بعد ما تتوثق عشان هتحتاجها برضو.
5- مواعيد مراكز التسجيل من الأحد للخميس، من 8 لـ 12.30.
مفيش مواعيد مسائية.
بدون حجز.
* أماكن مراكز التسجيل في اخر البوست.
6- في حالة استلام شهادة الميلاد من مستشفى الولادة في الصباح لازم تختمها من مركز تسجل المواليد عشان يتم توثيقها في الخارجية الكويتية.
7- دلوقتي مطلوب توثيق عقد الجواز في الهيئة العامة للمعلومات المدنية (الدور الاول – مكتب الواقعات المدنية) ودي خطوة ضرورية لاستخراج شهادة الميلاد، تعملها قبل الولادة أو بعدها مباشرة عشان ما تتأخرش.
الأوراق المطلوبة:
– صورة من عقد الزواج.
– صورة البطاقة المدنية لكل من الزوج والزوجة.
.
.
11- هتبعت الشهادة الكويتية الأصلية الموثقة لمصر عشان حد من قرايبك من الدرجة الأولي (الأعمام أو الأخوال أو الأجداد أو أي حد بتوكيل خاص يطلعلك الشهادة المصرية).
الشهادة ممكن تطلع في يوم وممكن تاخد 14 يوم حسب المكان، العباسية وطنطا وأسيوط مراكز رئيسة فالشهادة بتطلع هناك بسرعة.
* هتلاقي صورة في البوست فيها كل التفاصيل.
12- لما تطلع الشهادة المصرية يبعتلولك صورة واضحة منها على واتساب او بالإيميل، مش لازم تبعت الأصل، الصورة كفاية.
13- تقدر تعمل شهادة الميلاد المصرية من:
– العباسية.
– طنطا.
– اسيوط.
– اسكندرية.
– المنصورة.
* لو حد يعرف أماكن تانية لاستخراج الشهادة في مصر ياريت يقولنا نزودها.
14- بعض المراكز زي العباسية وأسيوط بيطلبوا إن شهادة الميلاد الكويتية تكون موثقة من الخارجية المصرية، وبيطلبوا كمان نسخة من شهادات ميلاد الأب والام وقسمية الجواز، لو مش معاك تقدر تطلعهم من نفس المكان وأنت واقف.
15- عشان تبعت شهادة الميلاد الكويتية لمصر بتشوف حد مسافر طبعاً كالمعتاد.
أو تروح المطار في وقت رحلات المدينة بتاعتك.
والأسهل والأريح إنك تبعتها عن طريق صرافات المزيني وبتكلفك 9 دينار، وبتاخد حوالي 4 أيام عمل.
16- مش محتاج توثق شهادة الميلاد المصرية قبل ما تبعتها، لأنك هتستخدمها هنا عشان تطلع الجواز فقط، لكن الأفضل توثيقها هى وأي مستند رسمي معاك لما بعد كدة.
.
.
21- هتقدم على الجواز من القنصلية (مش محتاج حجز موعد عشان موضوع التأخير)، ويكون معاك ما يلي:
– شهادة الميلاد المصرية (صورة ممكن تمشي).
– صورة جوازك وجواز الأم.
– 4 صور خلفية بيضا للطفل.
– صورة قسيمة الجواز الموثقة.
وهتدفع 97 دينار وتاخذ وصل للاستلام.
امتى بقى هيوصل الجواز؟
حالياً أقل مدة عرفتها كانت 21 يوم، بس قول ياسيدي من شهر لشهر ونص.
تابع صفحة القنصلية على فيسبوك لأنهم بينشروا أسماء اللي جوازاتهم وصلت، وكذلك الموقع، بتدخل عليه تحط رقم الإيصال بتاعك وتعرف وصل ولا لسة.
22- لو مر 45 يوم بالظبط على الولادة والجواز ما وصلش تاخد نفس الورق اللي انت اخدته وانت رايح تعمل الجواز وبتضيف عليهم:
– وصل استلام الجواز.
– نموذج الإقامة المؤقتة (موجود في صور البوست) قبل ما تروح واملاه عشان تكسب وقت.
روح بدون حجز.
هتستلم في نفس اليوم أو تاني يوم أو يومين انت وحظك من على الباب بالمدنية.
هتوثقها في الخارجية الكويتية بـ 5 دينار كمان.
الوثيقة الحمد لله مجانية.
تحاول تأخر نفسك في عمل الإقامة المؤقتة عشان يبقى عندك مهلة كافية، يعني ما تعملهاش بعد 30 أو 40 يوم من الولادة عشان ما تخسرش فرق الأيام اللي فاضل.
23- تروح علي شئون الإقامة بحجز موعد عشان تعمل إقامة مؤقتة للطفل، هتطبع الطلب من عند الطباعين بدينار، ومتنساش ورقك كله معاك بما فيهم إذن العمل وتروح تدق إقامة بشهرين مع وضع طابع بدينارين.
الورق المطلوب:
– طلب عمل اقامة مؤقتة من الطباعين.
– أصل وصورة من الوثيقة المؤقتة، موثقة طبعاً.
– صورة من مدنية الأب والام.
– صورة من جواز سفر الأب والام (احتياطياً).
– صورة من قسيمة الزواج، موثقة.
– صورة من إذن العمل (احتياطياً).
– صورة من شهادة الميلاد الكويتية (جوازات العاصمة هتطلب منك الأصل أو مستخرج منها).
24- لأي سبب ممكن يأخر وصول الجواز أكتر من كدة والإقامة المؤقتة هتنتهي يبقى هتروح تاني القنصلية تعمل وثيقة جديدة وتروح تحط إقامة تانية ولازم يكون معاك القديمة طبعاً.
25- هتشيك على الجواز على موقع القنصلية، لما يوصل هتسجل الرقم المسلسل بتاعه على وصل الاستلام.
هتروح القنصلية بالوصل وتستلم، بدون موعد.
اوتوماتيك القنصلية بتبلغ هيئة المعلومات بالجوازات اللي وصلت، ولازم خلال 30 يوم تكون عملت المدنية.
26- للعلم بعض إدارات الجوازات بترفض تعمل إقامة مؤقتة والمبرر إن مفيش مخالفة أو غرامة هتنزل عليك على التأخير بسبب الظروف.
27- طالما الطفل مولود هنا يبقى لازم الجواز يطلع من هنا عن طريق القنصلية، لأن في ناس بتفكر إنها تبعت تعمل الجواز من مصر، وده ما ينفعش. عشان تعمل الجواز لأي حد سواء طفل أو بالغ لازم صاحب الجواز يكون جوة البلد اللي هيصدر منها الجواز، يعني انت هنا يبقى تطلع الجواز من هنا، انت في مصر يبقى تطلع الجواز من مصر، الموضوع مالوش علاقة بإنك تعمل توكيل لحد.
.
.
31- هتروح الجوازات ولا تنسى إرفاق أصل نموذج الإقامة المؤقتة وصورة منها مع الاوراق.
موظف الاستقبال هياخد منك صورة من شهادة الميلاد ويبعتها بالفاكس لتفعيل الرقم المدني، أوقات بتاخد نص ساعة وساعات يومين، لما يتفعل وقتها تقدر تدفع التأمين الصحي وتكمل باقي الاجرءات.
رسوم التأمين 30 دينار.
32- الرسوم عن الطفل من الأول للتالت 100 دينار، أما الطفل الرابع 200 دينار.
لو أنت مادة 17 فبتكون معفي من رسوم الإقامة لأول 3 أطفال، والرابع بيكون بـ 100 دينار.
33- الطفل المولود بالكويت ليس مطلوب منه كشف طبي ولا مطلوب منه صورة شخصية في المدنية حتي سن الخمس سنوات.
34- لو عندك مشكلة في التأمين ومش قابل منك المعاملة؟ هتراجع إدارتهم في الشويخ.
وأي حد هيواجه مشكلة في التأمين الصحي الأونلاين بيراجع:
إدارة نظم المعلومات.
الشويخ منطقة الصباح الطبية.
بجوار جمعية صندوق إعانة المرضى.
41- بمجرد ما تدفع رسوم الإقامة هتوصلك رسالة من المدنية.
42- التقديم علي المدنية بيكون خلال 30 يوم من دق الإقامة، وله طريقتين، الأولى من خلال المراجعة، بتعمل ظرف المدنية، والتانية والأسرع من خلال موقع المدنية بخدمة المظروف الإلكتروني.
سواء هتقدم يدوي أو أونلاين هتقدم التالي:
– صورة جواز سفر الطفل.
– صورة برنت الإقامة.
– صورة شهادة الميلاد الكويتية.
– صورة فصيلة الدم اللي أخدتها من المستشفى.
بعدها بتنتظر يقبلوا الطلب ويبلغوك بالدفع وتنتظر صدورها.
43- لو لقيت عليك أي مخالفات هتاخد جواز السفر وصورة منه وصورة من المخالفة وتروح المدنية الفترة الصباحية من غير موعد، وتدخل على الشباك اللي قبل الشباك اللي مكتوب عليه مجلس التعاون وتاخد رقم وتطلع الدور الأول غرفة المخالفات والموظف هيشيل المخالفة.
.
.
51- لو نويت تسفر الطفل بدون ما تعمله إقامة بتعمل حاجة اسمها وثيقة سفر، بتحجز موعد في القنصلية وهتاخد الورق التالي:
– شهادة الميلاد المصرية أو الكويتية ويكونوا موثقين.
– أصل جوازك وجواز الأم وصورة منهم.
– أصل قسيمة الجواز الموثقة وصورة منها.
– صورتين خلفية بيضاء للطفل.
– طباعة الطلب، تقدر تستخدم النموذج اللي في الصور.
الوثيقة مجانية وبتاخد يومين تقريباً.
52- لو الطفل هيسافر مع أحد الوالدين فلازم الطرف التاني يحضر للقنصلية عشان يوقع بالموافقة على الوثيقة.
لو الطفل هيسافر مع حد غير الوالدين فلازم الاتنين يحضروا يوقعوا على الوثيقة.
53- هتحجز خارجية وتوثقها، وتحجز جوازات عشان تاخد ختم الخروجية.
54- لما تروح الجوازات هيدوك حوالي شهر مُهلة للمغادرة، مرات أقل أو أكتر، الأفضل تروح وانت حاجز طيران ومعاك صورة التذكرة عشان يدوك المهلة حسب المدة المتبقية للسفر..
.
.
61- الولادة في الحكومة 100 دينار طبيعي 150 قيصري.
الدخول بـ 10 دينار.
وكل ليلة مبيت بـ 10 دينار.
بس طبعاً في حاجات ممكن تحصل معاك وما تحصلش مع غيرك زي إنهم يطلبوا تحاليل إضافية.
مراجعة الحمل بـ 10 دينار بس لازم تعمل ملف طبعاً.
62- الولادة في الخاص في حدود 200 دينار للطبيعي و300 أو 350 للقيصري، وفي حقنة بتكون في حدود 85 دينار كمان بتاخدها الام قبل الولادة القيصرية.
.
.
71- كل ما عملت العملية بدري يكون أفضل، خلال أول أسبوع أو بالكتير قبل ما يتم 40 يوم عشان تكون سهلة على الطفل.
72- طبعاً الأفضل والأسهل تعملها في الخاص، هتكلفك من 100 دينار وأنت طالع، ممكن تلاقي مكان يقولك 400 أو 500 دينار.
73- بالنسبة للحكومي، الطهارة يتيجي تحت بند العمليات الصغرى، هتراجع المستشفى الأقرب ليك، هتدفع 10 دينار وتاخد موعد، والموعد بيكون خلال شهر تقريباً.
مرات بيحددولك ميعاد كشف الأول يشوفوا الطفل عشان على حسب وزنه وحالته بيحددوا تاريخ العملية.
أخر معلومة وصلتني إن البروتوكول الجديد هو إن عملية الختان بتكون بعد 3 شهور من الولادة.
74- لو الطفل تم 6 شهور هيرفضوا يستقبلوه في الحكومة لحد ما يتم سنة.
75- كان زمان فوق الـ 6 شهور الطهارة ببنج كلي ونزلت لـ 4 شهور.
76- هتلاقي في ناس بترشح ناس غير متخصصين بيعملوا العملية في البيت بس ياريت بلاش، لا تخاطر بصحة ولادك.
.
.
81- مراكز التسجيل:
– موقع مركز تسجيل مواليد حولي على جوجل مابس:
– موقع مركز تسجيل مواليد صبحان على جوجل مابس:
82- الخارجية:
مش محتاجة خلاص حجز دلوقتي.
– موقع الخارجية الكويتية، فرع الشويخ على جوجل مابس:
– موقع الخارجية الكويتية، فرع صبحان:
– برج التحرير مكانه معروف مش محتاج لوكيشن.
83- القنصلية المصرية:
– رابط حجز مواعيد القنصلية المصرية:
– موقع القنصلية المصرية بالكويت بالسلام على جوجل مابس:
84- هيئة المعلومات المدنية:
– رابط حجز مواعيد هيئة المعلومات المدنية بجنوب السرة على منصة منى:
.
.
91- لو حصل والطفل سافر بوثيقة وما عملش هنا إقامة وعايز بقى تجيبه بعد ما تستقر الأمور؟
بتعمله كارت زيارة ولما يوصل بتحولها التحاق وصل الله وبارك.
بس خلي بالك إن دلوقتي مفيش زيارات، والاستثناء الوحيد بيكون للأطفال الرضع زي وضعك كدة، بس ده ما يمنعش إنك تلاقي صعوبة إنك تعمل الزيارة
92- ياريت أي معاملة محتاجة طباعة تحاول تطبعها في البيت أو الشغل أو عند الطباعين اللي في الشارع أو الجمعيات عشان تكسب وقت وما تتعطلش كتير عن الطباعين اللي عند الجوازات.
93- الخطوات المذكورة فيها جزء كبير خاص بالمصريين فقط، لو في حد من الجنسيات الأخرى ويقدر يزودنا بالخطوات الخاصة بيهم في بلادهم ياريت يبعتهالي .
مقالات ذات صلة
